José Mourinho ka dalë hapur në mbrojtje të Kylian Mbappé, duke e cilësuar si “qesharake” polemikën e krijuar rreth sulmuesit të Real Madridit gjatë pushimit të kombëtareve.
Francezi është kritikuar për udhëtimet në Francë dhe Zvicër gjatë kohës që po rikuperohej nga një problem në gju, për pamjet e tij në një event nate dhe për faktin që u stërvit i vetëm pas rikthimit në Madrid.
Mourinho, megjithatë, këmbënguli se Mbappé nuk ka bërë asgjë që bie ndesh me detyrimet e tij ndaj klubit.
“E ekzagjeruar? Është qesharake”, deklaroi trajneri, duke fajësuar mediat për krijimin e një klime negative rreth lojtarit.
Tekniku portugez sqaroi se Mbappé kishte marrë diagnozën nga Real Madridi dhe më pas kishte kryer edhe një konsultë të jashtme për shkak të historikut të gjurit, me të dyja vlerësimet që përputheshin.
Ai komentoi gjithashtu pamjet që kishin shkaktuar polemika.
“Diskoteka nuk ishte diskotekë, por një ambient i transformuar për një event privat të Javës së Modës në Paris. Ndërsa biçikleta ishte thjesht mjeti për të lëvizur brenda një hoteli me shtëpi të vogla. Dukej sikur po bënte ‘Tour de Suisse’”, ironizoi Mourinho.
Trajneri shkoi edhe më tej, duke akuzuar mediat se po përpiqen të ndikojnë te reagimi i tifozëve në “Santiago Bernabéu”.
“Të bëni Bernabéun të fishkëllejë është një nga objektivat tuaj. Nuk duhet të jesh Ajnshtajn për ta kuptuar”, tha ai.
Mourinho konfirmoi gjithashtu se Mbappé do të jetë titullar në ndeshjen e radhës.
“Jam i sigurt se Mbappé nuk e ka zhgënjyer Real Madridin. Nuk ka dështuar në detyrimet e tij. Një lojtar që nuk sillet si lojtar i Real Madridit nuk do të jetë as në stol, do të qëndrojë në shtëpi.”
Në konferencë, Mourinho foli edhe për situatën e Valverdes, që mbetet në dyshim, për rikuperimin e Militãos dhe për Vinicius, për të cilin kërkoi më shumë mbështetje.
“Vinicius dëshiron shumë të rikthehet në nivelin e tij. Ai meriton të ndihmohet”, përfundoi Mourinho.
