Një marins amerikan 20-vjeçar është arrestuar në Okinawa të Japonisë, nën dyshimin për grabitjen dhe vrasjen e një gruaje japoneze 39-vjeçare. Policia thotë se Devin Jacob Ballard, i stacionuar në bazën ajrore amerikane Futenma, dyshohet se e vrau gruan në një hotel në qytetin Naha dhe i mori portofolin dhe çantën. I dyshuari i ka mohuar akuzat.
Sipas autoriteteve japoneze, kamerat e sigurisë kanë regjistruar një burrë që hynte në hotel bashkë me viktimën dhe më pas largohej vetëm, duke mbajtur sendet e saj. Policia e gjeti dhe e arrestoi marinsin pasi ai përputhej me përshkrimin e personit të filmuar.
Rasti ka shkaktuar reagim të fortë në Japoni. Kryeministrja Sanae Takaichi tha se Tokio i ka paraqitur një protestë zyrtare Shteteve të Bashkuara dhe kërkoi bashkëpunim maksimal në hetim, disiplinë më të rreptë për personelin ushtarak amerikan dhe masa për të parandaluar raste të ngjashme. Okinawa ka prej dekadash tensione për praninë e madhe ushtarake amerikane në ishull.
