Emiliano Gjoni është 15-vjeçari që humbi jetën mbrëmjen e sotme në qytetin e Shkodrës, si pasojë e një konflikti me një person të paidentifikuar.
Adoleshenti mori disa lëndime me thikë në pjesë të ndryshme të trupit, dhe sipas raportimeve u gjet i braktisur në rrugë nga një kalimtar i rastësishëm. Në këtë moment ai ka pasur shenja jete, dhe qytetari e ka dërguar në spitalin e qytetit, ku fatkeqësisht ndërroi jetë si pasojë e plagëve që kishte marrë.
Sipas policisë, dyshimet për këtë rast lidhen me një sherr në të cilin 15-vjeçari u përfshi dhe mori lëndimet që i kushtuan jetën. Autori i ngjarjes është larguar në drejtim të paditur dhe ende nuk është identifikuar nga uniformat blu.
Kujtojmë se krimi i rëndë ndodhi rreth orës 19:30 në lagjen Skenderbeg. Policia dhe grupi hetimor kanë zbritur në terren për të zbardhur ngjarjen, motivet, dinamikën, si edhe për të identifikuar dhe arrestuar autorin e vrasjes.
