Kandidati për kryeministër nga radhët e PDK-së, Bedri Hamza në një konferencë për mediet tha se kryeministri në detyrë, Albin Kurti i ka paraqitur zgjedhjet e 9 shkurtit si refrendum.
Por sipas tij, Kurti nuk e arriti këtë qëllim, pasi nuk mori 500 mijë vota.
Hamza shtoi se shumë qytetarë që në të kaluarën votuan Vetëvendosjen, në këto zgjedhje i kthyen shpinën.
“Qytetarë të dashur, për shkak të rezultatit të tuaj, sot është një ditë më ndryshe se dje. Vullneti tuaj u shpreh qartë në zgjedhjet e djeshme. Lëvizja Vetëvendosje ka humbur një numër të madh të votave. Shumë qytetarë që e kishin votuar në të kaluarën, tashmë veç ia kanë kthyer shpinën”, tha Hamza.
“Ata erdhën kryesisht tek ne në PDK, edhe te Lidhja Demokratike. Kryeministri në detyrë i paraqiti këto zgjedhje si një referendum për vetën dhe qeverinë e tij, por qëllimi nuk u arrit. Ai kërkoi 500 mijë vota, por nuk i mbërri, nuk ia dhanë qytetarët”, tha ai.
Më tej, ai e bëri të qartë se nuk do të hyjë në kolicion me Lëvizjen Vetëvendosje.
Hamza tha se qytetarët fuqizuan partitë opozitare, prandaj sipas tij, ata nuk duan që qeveria e tanishme të vazhdojë edhe një mandat tjetër.
”Sot, shumica e qytetarëve që votuan, nuk duan që e njëjta qeveri të vazhdojë, qytetarët me vullnetin e tyre politik, i kanë besuar opozitës, andaj në këto zgjedhje kanë fuqizuar partitë opozitare. Kjo më obligon mua, si partinë më të madhe opozitare, që në mënyrë të përgjegjshme ta respektojmë vullnetin e shumicës shqiptare për ndryshim. Ne nuk do të përfshihemi në asnjë koalicion me LVV-në”, tha ai.
Sipas KQZ, deri tani (ora 17:00) janë numëruar 2463 kuti nga 2533 total. Po sipas KQZ, prit LVV me 41.8% të votave, e ndjekur nga PDK me 22.21% dhe LDK me 17.75%./
