Autoritetet turke kanë lëshuar urdhër ndalimi për 18 persona, mes tyre aktorët e njohur Aras Bulut İynemli dhe Melis Sezen, reperi Sefo si dhe ish-futbollisti Hasan Şaş, në kuadër të një hetimi për drogë të nisur nga Prokuroria e Përgjithshme e Bakırköyt në Stamboll.
Operacioni u zhvillua më 18 shtator nga ekipet e Komandës së Xhandarmërisë së Provincës së Stambollit, me udhëzim të prokurorëve.
Në mesin e personave të tjerë të përfshirë në hetim janë edhe aktorët Nilperi Şahinkaya, Melis İşiten, Yeliz Yeşilçimen, Anıl Durmuş, Hazal Filiz Küçükköse, Volkan Akçıray, Zeynep Akçıray, Eda Güzelçik, Sezer Çakır, Sayat Zurnacı dhe Hande Demir.
Në një deklaratë, Prokuroria e Përgjithshme e Bakırköyt bëri të ditur se hetimi përfshin persona të njohur publikisht si aktorë, këngëtarë, biznesmenë, operatorë lokalesh dhe figura të rrjeteve sociale.
Sipas prokurorisë, janë siguruar prova që krijojnë dyshime të arsyeshme se personat nën hetim kanë përdorur substanca narkotike ose stimuluese, kanë lehtësuar përdorimin e tyre apo kanë ofruar ambiente për konsumimin e tyre.
Prokuroria ka urdhëruar Xhandarmërinë e Provincës së Stambollit të ndalojë dhe kontrollojë 18 të dyshuarit, të kryejë ekzaminimet biologjike, të marrë deklaratat e tyre dhe më pas t’i paraqesë para prokurorëve.
Hetimi vazhdon nën drejtimin e Prokurorisë së Përgjithshme të Bakırköyt./TV Klan
