Vinicius Junior po kalon një nga momentet më të vështira që prej ardhjes te Real Madridi. Braziliani është i vetëdijshëm se forma e tij aktuale është shumë larg nivelit që pritet prej tij dhe derbi ndaj Atlético Madridit duket se ka shënuar një pikë kthese.
Paraqitja e dobët në “Metropolitano”, zëvendësimi pak pas nisjes së pjesës së dytë dhe humbja e skuadrës e kanë goditur fort 26-vjeçarin. Vinicius e ka pranuar edhe publikisht se duhet të reagojë dhe se diçka duhet të ndryshojë për të rikthyer versionin e tij më të mirë.
Tani ai do të kalojë dy javë me Brazilin, në një moment që mund t’i shërbejë edhe për t’u shkëputur nga presioni në Madrid. Situata këtë herë nuk lidhet me raportin me trajnerin, siç kishte ndodhur më parë me Xabi Alonson, por kryesisht me pakënaqësinë që vetë lojtari ka ndaj paraqitjeve të tij.
Muajt e pasigurisë rreth së ardhmes dhe kontratës duket se kanë ndikuar gjithashtu, megjithëse Real Madridi vazhdon t’i tregojë mbështetje. Klubi qëndroi pranë tij edhe gjatë periudhës kur Arsenal ishte i interesuar për transferimin e tij dhe më pas arriti marrëveshjen për rinovim.
José Mourinho vazhdon të ketë besim te Vinicius, por vendi i titullarit nuk konsiderohet më i garantuar. Me Diomande që po fiton terren, braziliani e di se reagimi duhet të vijë shpejt. Tani gjithçka varet prej tij: nga forma fizike, besimi dhe aftësia për t’u rikthyer te Vinicius që dikur vendoste ndeshjet.
