Kryeministri Edi Rama iu ka dërguar zyrtarisht ftesë institucioneve të drejtësisë për të mbajtur një takim më datë 28 shtator për të biseduar në lidhje me pagat e magjistratëve.
Kryeministri i ftoi publikisht në tryezë një ditë pas miratimit të projektligjit për pagat e magjistratëve në parlament, që u kundërshtua, duke theksuar se duhet që të diskutojnë për një zgjidhje afatgjatë.
Në reagimin e tij, kryeministri deklaronte se të pranishëm në tryezë do të jenë edhe ekspertë të Këshillit të Evropës dhe të Komisionit Evropian për Efiçencën e Drejtësisë.
Sipas tij, duhet ta trajtojnë çështjen me “urtësi dhe durim” dhe për të dhënë një shembull dinjiteti shtetëror përpara qytetarëve dhe partnerëve të vendit.
Maxhoranca e miratoi projektligjin e PS në seancën e kaluar me 84 vota pro, 24 kundër dhe 1 abstenim, pavarësissht kundërshtive të institucioneve të drejtësisë dhe opozitës, të cilët theksuan se po shkelej vendimi i Gjykatës Kushtetuese.
Magjistratët, megjithatë, kanë paralajmëruar se do ta dërgojnë ligjin e miratuar, dhe të dekretuar pak orë më pas nga Presidenti, në Kushtetuese.
