Shahd Najeeb ende kujton traumën e largimit nga luftëtarët e Shtetit Islamik gjatë luftës civile në Siri. Më shumë se një dekadë pasi gjeti strehim në Gjermani, ajo tani ka frikë se mund të mos jetë më e mirëpritur në vendin që e konsideron shtëpi.
Najeeb dhe bashkëshorti i saj u larguan nga Deir al-Zor në lindje të Sirisë dhe ndërtuan jetën e tyre në Gjermani. Ai punon në një berberhane, ndërsa ajo shërben ushqim në shkollat lokale. Çifti ka dy fëmijë.
“Jemi mirënjohës ndaj popullit gjerman që na mirëpriti dhe na dha paqe e siguri”, tha bashkëshorti i saj, Mahmoud Hmouech, për Reuters.
Por rritja e mbështetjes për partinë e djathtë AfD dhe rikthimi i emigracionit në qendër të debatit politik kanë shtuar shqetësimet mes komuniteteve të emigrantëve në Gjermaninë lindore. Reuters foli me 20 persona me prejardhje emigrante në Rostock dhe Schwerin. Shumë prej tyre thanë se vitet e fundit kanë përjetuar më shumë fyerje dhe komente kundër të huajve.
Najeeb, e cila ka studiuar fizikë dhe jeton prej vitesh në Rostock, tregoi se një burrë e kishte fyer në një dyqan ushqimor dhe i kishte thënë se nuk i përkiste Gjermanisë. Ajo tha se kjo i ka shkaktuar një dhimbje të ndryshme nga ajo që kishte përjetuar më parë.
Shqetësimet vijnë ndërsa AfD pritet të ketë një rezultat të fortë në zgjedhjet rajonale të Mecklenburg-Pomeranisë Perëndimore. Partia kërkon kufizime më të mëdha ndaj emigracionit dhe ka përdorur termin “remigrim” për kthimin e të huajve në vendet e tyre të origjinës.
Ndërkohë, ekonomistët paralajmërojnë se Gjermania lindore përballet me plakje të popullsisë dhe mungesë fuqie punëtore. Në Mecklenburg-Pomeraninë Perëndimore punojnë rreth 50 mijë persona me prejardhje migrante, ndërsa në të gjithë Gjermaninë rreth 316 mijë shtetas sirianë janë të punësuar dhe kontribuojnë në sistemin e sigurimeve shoqërore.
Për familjen e Najeeb, e ardhmja tashmë është e lidhur me Gjermaninë. Bashkëshorti i saj thotë se nuk dëshiron që fëmijët e tyre të rriten me ndjenjën se shoqëria ku kanë lindur i refuzon.
