Kylian Mbappé ka dhënë intervistën e tij të parë ekskluzive për një media sportive spanjolle si lojtar i Real Madridit, duke folur hapur për jetën në Madrid, ëndrrën e realizuar për të veshur fanellën e bardhë, marrëdhënien me José Mourinhon dhe ambiciet për të ardhmen.
“Kur bëhesh lojtar i Real Madridit, kalon në një tjetër nivel. Besoj se nëse dëshiron të jesh pjesë e historisë së futbollit, një ditë duhet të luash për Real Madridin”, deklaroi francezi, i cili pranoi se jeta në Spanjë i ka dhënë edhe më shumë qetësi. Për “Bernabéun”, Mbappé foli me emocion: “Është një stadium legjendar. E ndjen peshën e historisë. Nuk ka vend më të mirë në botë sesa një nga ato netët magjike këtu.”
Sulmuesi foli gjithashtu për Florentino Pérez, duke zbuluar se presidenti i Realit kishte qëndruar në kontakt me të për rreth një dekadë. “Gjithmonë më thoshte se një ditë do të luaja për Real Madridin. Askush nuk kishte nevojë të më bindte të vija këtu. Për mua ishte diçka e qartë.”
Mbappé rezervoi fjalë të veçanta edhe për José Mourinhon: “Është një nga njerëzit më inteligjentë që kam njohur. Është lider. Kur punon me të çdo ditë, kupton se është një person i veçantë dhe një trajner legjendar.” Francezi shtoi se Mourinho nuk i ka vendosur një objektiv të caktuar golash, pasi vetë Mbappé nuk dëshiron t’i vendosë kufij vetes.
Një tjetër temë ishte Topi i Artë. Mbappé theksoi se synimi i tij është që trofeu të rikthehet në Madrid: “Më e rëndësishmja është që Topi i Artë të kthehet te Real Madridi, në Bernabéu dhe te madridistët. Ata e meritojnë më shumë se kushdo.” Për Lamine Yamal, francezi u tregua gjithashtu pozitiv: “Është një talent i madh dhe kam ndjesinë se do të ketë një karrierë të jashtëzakonshme.”
Duke folur për Botërorin, Mbappé pranoi superioritetin aktual të Spanjës: “Skuadra që dominon është ajo që fiton, dhe tani ajo skuadër është Spanja. Për momentin, është kombëtarja më e mirë në botë.”
Në fund, ai u dërgoi edhe një mesazh tifozëve të Realit, pas një sezoni pa trofe: “E kuptoj presionin dhe kërkesat. Por nëse duam të fitojmë, nuk mund ta bëjmë pa tifozët. Duhet të ecim së bashku, dorë për dore. Vetëm kështu do të jemi shumë më të fortë.”
