Policia ka reaguar për plagosjen me armë zjarri të ndodhur pasditen e sotme në lagjen Nr. 1 të Durrësit.
Sipas informacionit paraprak, rreth orës 17:30, shtetasi F. F., 61 vjeç, banues në Durrës, dyshohet se pas një konflikti për motive të dobëta ka qëlluar me armë zjarri 52-vjeçarin E. Sh.
I plagosuri ka marrë një plumb në dorë dhe, sipas Policisë, ndodhet jashtë rrezikut për jetën.
Menjëherë pas ngjarjes, shërbimet e Policisë kanë shkuar në vendin e incidentit dhe kanë ngritur pika kontrolli në zonë, ndërsa vijon krehja e territorit për lokalizimin dhe kapjen e autorit të dyshuar.
Ndërkohë, grupi hetimor, nën drejtimin e Prokurorisë, po punon për të dokumentuar plotësisht ngjarjen dhe për të sqaruar rrethanat dhe motivet e konfliktit.
