Arabia Saudite mund të shterojë rezervat e naftës që mban për eksport brenda pak ditësh, nëse nuk arrin të rikthejë në funksion një nga tubacionet kryesore që lidh fushat e naftës me portin e Yanbu në Detin e Kuq.
Sipas blerësve të naftës saudite dhe tregtarëve të cituar nga Reuters, rezervat në portin e Yanbu mund të mjaftojnë vetëm për pesë deri në shtatë ditë nëse tubacioni East-West mbetet jashtë funksionit.
Tubacioni, rreth 1,200 kilometra i gjatë, ka transportuar së fundmi rreth 4 deri në 5 milionë fuçi naftë në ditë, ekuivalente me rreth 4-5% të furnizimit global. Ai është bërë veçanërisht i rëndësishëm pasi transporti përmes Ngushticës së Hormuzit është reduktuar ndjeshëm për shkak të luftës.
Tubacioni u mbyll përkohësisht pas një sulmi me dron. Arabia Saudite dhe Iraku kanë thënë se sulmi kishte origjinën nga territori irakian, ku veprojnë milici të mbështetura nga Irani. Deri tani, nuk ka pasur një pretendim zyrtar për përgjegjësinë për sulmin.
Situata po shton presionin mbi tregjet ndërkombëtare të energjisë. Çmimi i naftës Brent ka kaluar sërish mbi 100 dollarë për fuçi, ndërsa një ndërprerje e zgjatur e tubacionit do të reduktonte më tej furnizimin global dhe mund të shkaktonte rritje të reja të çmimeve të karburanteve.
Kriza vjen në një moment kur edhe rrugët kryesore detare të naftës janë nën presion. Ngushtica e Hormuzit mbetet kryesisht e bllokuar, ndërsa Houthit në Jemen kanë forcuar kontrollin pranë Bab el-Mandebit, duke krijuar një tjetër pikë kritike për transportin energjetik.
