Procesi gjyqësor ndaj një nëne nga Massachusetts, e akuzuar për vrasjen e tre fëmijëve të saj, ka përfunduar pa një verdikt, pasi juria nuk arriti të binte dakord unanimisht për përgjegjësinë e saj penale.
Pas shtatë ditësh deliberimesh dhe më shumë se 35 orësh diskutime, juria i dërgoi gjykatës një tjetër njoftim se nuk ishte në gjendje të arrinte një vendim unanim. Gjykatësi William Sullivan shpalli kështu një mistrial, duke e konsideruar procesin të pavendosur.
Çështja lidhet me vdekjen e tre fëmijëve, Cora, 5 vjeç, Dawson, 3 vjeç dhe Callan, vetëm 8 muajsh, të cilët u gjetën të pajetë në bodrumin e shtëpisë së familjes në Duxbury, në janar të vitit 2023.
Nëna ka pranuar se i vrau fëmijët, por mbrojtja argumentoi gjatë gjithë procesit se në atë moment ajo vuante nga një episod i rëndë psikozë pas lindjes dhe nuk ishte në gjendje të kuptonte natyrën dhe pasojat e veprimeve të saj. Avokati kërkoi që ajo të shpallej e pafajshme për shkak të mungesës së përgjegjësisë penale.
Prokuroria, nga ana tjetër, pranoi se gruaja kishte pasur probleme të shëndetit mendor, por argumentoi se ajo ishte në gjendje të kuptonte se vrasja e fëmijëve ishte e gabuar dhe se veprimet e saj ishin të qëllimshme. Prokurorët paraqitën prova se ajo kishte planifikuar kohën kur bashkëshorti do të largohej nga shtëpia dhe do të kthehej.
Pak para shpalljes së mistrial-it, avokati i mbrojtjes kërkoi një ndërhyrje urgjente nga Gjykata e Lartë e Massachusetts për të ndaluar vendimin. Kërkesa nuk u pranua dhe mistrial-i mbeti në fuqi.
Tashmë prokuroria duhet të vendosë nëse do të kërkojë një gjyq të ri me një juri tjetër, do të negociojë një marrëveshje për pranimin e fajësisë apo do të heqë dorë nga ndjekja penale. Një seancë për të përcaktuar hapat e mëtejshëm është planifikuar për 29 shtator.
