Një zjarr i përmasave të mëdha ka përfshirë mesditën e sotme një sipërfaqe me ullishte dhe shkurre në kodrat e Radostinës, në vendin e quajtur “Fiqtë”. Flakët kanë alarmuar banorët e zonës, ndërsa shërbimet zjarrfikëse janë angazhuar për vënien nën kontroll të situatës.
Në terren ndodhen 8 mjete zjarrfikëse, rreth 40 efektivë, 20 forca bashkiake dhe dy autobote, të cilët po punojnë për izolimin dhe shuarjen e vatrave të zjarrit. Për shkak të përmasave të flakëve, është kërkuar edhe ndërhyrje nga ajri për të ndihmuar në neutralizimin e vatrave.
Situata paraqitet e vështirë për shkak të erës së fortë, e cila favorizon përhapjen e flakëve. Ndërkohë, terreni i thyer i kodrave e vështirëson lëvizjen e mjeteve zjarrfikëse dhe afrimin e tyre pranë vatrave aktive.
Ekipet e emergjencës vijojnë operacionin në terren me qëllim izolimin e zjarrit dhe parandalimin e përhapjes së tij drejt sipërfaqeve të tjera. Deri në këto momente nuk raportohet për persona të lënduar, ndërsa mbetet për t’u përcaktuar shkaku i rënies së zjarrit dhe sipërfaqja e prekur.
