Ish-presidentja e Kosovës, Vjosa Osmani, ka reaguar pas marrëveshjes mes LDK-së dhe LVV-së për emrin e kandidatit për president të Kosovës, duke shprehur mbështetjen e saj për Prof. Dr. Bekim Sejdiun.
Përmes një postimi në Facebook, Osmani e ka cilësuar Sejdiun si një figurë me integritet dhe vizion, duke theksuar se ai është një profesionist i dëshmuar dhe një person që njeh nga afër institucionet dhe sfidat e Kosovës.
“Prof. Dr. Bekim Sejdiu. Një profesionist i dëshmuar, një njeri me integritet dhe një figurë që e njeh nga afër shtetin, institucionet dhe sfidat e Kosovës”, shkruan Osmani.
Ajo ka veçuar gjithashtu bashkëpunimin e gjatë me Sejdiun, duke thënë se e njeh prej 25 vitesh dhe se ka punuar me të edhe gjatë kohës kur ajo drejtonte Presidencën e Kosovës.
Në reagimin e saj, Osmani ka nënvizuar se vendimi për presidentin e ardhshëm u takon përfaqësuesve të zgjedhur të Republikës dhe se përgjegjësia për këtë zgjedhje është historike.
“Ta bëjmë këtë zgjedhje duke menduar për Kosovën që duam të ndërtojmë, për interesin shtetëror, për stabilitetin institucional, për fuqizimin e aleancës euroatlantike e për demokracinë”, shprehet ajo.
Në përfundim të postimit, Osmani ka uruar që procesi të jetë në të mirë të vendit: “Na priftë e mbara, për Republikën mbi të gjitha!”
