Një 43-vjeçar zviceran është arrestuar pas të shtënave me armë në një festë techno rave në qytetin Aarau të Zvicrës, ku një 22-vjeçare italiane humbi jetën dhe pesë persona të tjerë u plagosën.
Ngjarja ndodhi të dielën në pistën e garave me kuaj Schachen, ku ishte organizuar një festë ku priteshin rreth 3,500 pjesëmarrës.
Policia mori njoftimin për të shtënat rreth orës 02:30 të mëngjesit. 22-vjeçarja Maria Spinelli humbi jetën në vendngjarje, ndërsa katër burra dhe një grua, të moshës 24 deri në 27 vjeç, u dërguan në spital me plagë nga të lehta deri në të rënda.
Pas një kërkimi që zgjati gati 24 orë, policia e kantonit Aargau njoftoi se kishte arrestuar të dyshuarin pak para orës 01:00 të së hënës.
Autoritetet zvicerane bëjnë me dije se hetimet vijojnë për të zbardhur rrethanat e plota të ngjarjes, motivin e mundshëm dhe dinamikën e të shtënave. Sipas policisë, dyshohet se autori ka vepruar i vetëm.
