Një rast i kultivimit të bimëve narkotike është goditur në Bulqizë.
Policia ka sekuestruar dhe asgjësuar 215 bimë të dyshuara Cannabis Sativa dhe në kuadër të operacionit të koduar “Indicia”, në pranga ka rënë një 37-vjeçar, i cili u kap në flagrancë në zonën ku ishin kultivuar bimët narkotike.
“Shërbimet e Komisariatit të Policisë Bulqizë, si rezultat i kontrolleve intensive në terren, bazuar edhe në informacionet e siguruara në rrugë operative, në fshatin Okshtun i Vogël, njësia administrative Ostren, zbuluan 2 parcela, në të cilat ishin kultivuar 215 bimë të dyshuara narkotike Cannabis Sativa.
Gjatë ndërhyrjes, shërbimet e Policisë kapën në flagrancë shtetasin S. K., 37 vjeç, banues në Kamëz, Tiranë, i cili, në vijim të veprimeve të para hetimore, u arrestua si autor i dyshuar i kultivimit të bimëve narkotike”, njofton policia.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
