Gjatë 24 orëve të fundit, janë raportuar 34 vatra zjarri, nga të cilat 5 mbeten aktive dhe 4 të tjera nën mbikëqyrje.
Ministria e Mbrojtjes bën me dije se fokusi kryesor mbetet në Malin e Dajtit, ku vatrat vijojnë aktive pas disa riaktivizimeve në të dyja anët e kreshtës.
Forcat zjarrfikse ndodhen në terren, ndërsa nga ajri po punohet me një helikopter dhe dy avionë Air Tractor, por nuk ka rrezik për banesat.
Në Dibër, raportohen dy vatra aktive, në Ballenjë–Kostenjë dhe në Qafë të Helmës, ku gjithashtu nuk raportohen rreziqe për zonat e banuara.
Po ashtu aktive janë edhe vatrat në Malin e Dardhës Librazhd, dhe në Malin e Qukësit, Prrenjas, ku ka pasur riaktivizim.
Situata paraqitet më e përmirësuar në Pukë, ku në Gjegjan, Gojan i Vogël, Gojan i Madh, Prozhëm dhe Tërbun nuk ka më vatra aktive.
