Një grua nga Florida u ndalua në një pikë kontrolli të sigurisë në Aeroportin Ndërkombëtar të Miamit, pasi u përpoq të kalonte fshehurazi dy breshka, të cilat i kishte futur në reçipetat e saj. Autoritetet e identifikuan rastin pasi breshkat ishin mbështjellë me garzë dhe qese plastike.
Fatkeqësisht, njëra prej breshkave ngordhi, ndërsa tjetra u dorëzua te Departamenti i Peshqve dhe Kafshëve të Egra në Florida. Autoritetet nuk kanë bërë të ditur identitetin e gruas apo se ku po udhëtonte.
Administrata e Sigurisë së Transportit (TSA) reagoi me humor ndaj rastit, duke u kërkuar udhëtarëve të mos përpiqen të fshehin kafshë në vende të pazakonta të trupit për t’i kaluar përmes kontrolleve të sigurisë. “Ju lutemi, ndaloni së fshehuri kafshë në vende të çuditshme të trupit dhe më pas të përpiqeni t’i kaloni fshehurazi në kontrollin e aeroportit”, shkroi TSA.
Autoritetet sqaruan se kafshët shtëpiake mund të lejohen të kalojnë në pikat e kontrollit, por duhet të nxirren nga kafazet ose mbajtëset dhe të kalohen në mënyrë të sigurt nga pasagjeri. Përpara udhëtimit, pasagjerët këshillohen gjithashtu të kontaktojnë kompaninë ajrore për të mësuar rregullat specifike për transportin e kafshëve.
