Jozefin Marku është përjashtuar sot nga “Big Brother VIP Albania” me zarf të zi, pas debatit të ashpër me Gjestin, ku i drejtoi atij një shprehje fyese: “Kopil shkjau”.
Menjëherë pas largimit, ai ishte i ftuar në emisionin “Shqipëria Live” në Top Channel, ku e pranoi se kishte përdorur një krahasim të tepruar, por shtoi se nuk e kishte drejtuar drejtpërdrejt ndaj Gjestit dhe se ky i fundit ishte viktimizuar.
“Nuk ia thashë aspak personit në fjalë ose me tendencën e asaj historie të rëndë që kemi. Më vjen keq që jam përjashtuar. Më erdhi keq për Lorin, Bonën dhe Aldon. Është krahasim i tepërt, e pranoj, por nuk ishte drejtuar ndaj Gjestit direkt. Vetëm një njeri pa gjak shqiptari mund ta bëjë këtë dhe të mos kërkojë falje. Ai s’di të kërkojë falje, viktimizohet”, u shpreh ai.
Gjithashtu, ai theksoi se ai përfaqëson më mirë shqiptarët e Kosovës sesa Gjesti. “Shqiptarët e Kosovës i dua unë më shumë se Gjesti dhe mund të tregoj shembullin më të mirë për ta. Ai që mund t’i përfaqësojë kosovarët jam unë”, deklaroi ai.
