Pamjet nga vendngjarja tregojnë përmasat e rënda të aksidentit tragjik të regjistruar në orët e para të mëngjesit në Manzë të Durrësit, ku tre persona humbën jetën dhe dy të tjerë u plagosën.
Automjeti tip BMW me të cilin po udhëtonin të rinjtë, është dëmtuar rëndë dhe thuajse tërësisht. Nga të dhënat paraprake dyshohet se drejtuesi ka humbur kontrollin mbi automjetin, duke rënë në një kanal dhe më pas duke u përplasur me një strukturë betoni në anë të rrugës.
Përplasja rezultoi fatale për tre prej personave që ndodheshin në makinë. Në vendngjarje kanë mbërritur shërbimet e emergjencës dhe zjarrfikësit, të cilët kanë ndërhyrë për nxjerrjen e personave nga automjeti dhe për t’u ardhur në ndihmë të plagosurve.
Dy personat e plagosur janë transportuar për ndihmë mjekësore drejt Tiranës, ndërsa njëri prej tyre, një 16-vjeçar, raportohet në gjendje të rëndë shëndetësore.
Ndërkohë, tre personat që humbën jetën si pasojë e aksidentit janë nxjerrë nga automjeti dhe janë transportuar drejt morgut.
Forcat zjarrfikëse kanë ndërhyrë gjithashtu për nxjerrjen e automjetit BMW nga kanali, ndërsa në vendngjarje kanë vijuar veprimet e grupit hetimor për të dokumentuar dhe zbardhur dinamikën e plotë të aksidentit.
Aksidenti ndodhi rreth orës 02:22 në një rrugë dytësore në Manzë. Sipas informacionit paraprak të Policisë, viktimat janë drejtuesi i automjetit, K. V., 25 vjeç, si dhe pasagjerët S. B., 26 vjeçe, dhe A. M., 15 vjeç.
