Pentagoni po shqyrton mundësinë e reduktimit të pranisë ushtarake amerikane në Gjirin Persik pas përfundimit të luftës me Iranin, raporton The Washington Post.
Sipas gazetës, Departamenti amerikan i Mbrojtjes po vlerëson nëse do të rikthejë bazat ushtarake në rajon në gjendjen e tyre të mëparshme, pasi ato janë dëmtuar rëndë nga sulmet iraniane gjatë konfliktit.
Një nga opsionet që po shqyrtohet është tërheqja e një pjese të trupave amerikane nga Gjiri Persik dhe zhvendosja e tyre në zona të tjera të Lindjes së Mesme.
Analiza po drejtohet nga zyra e politikave të Pentagonit, por zyrtarët theksojnë se nuk bëhet fjalë ende për një rishikim zyrtar të politikës ushtarake amerikane dhe nuk është marrë asnjë vendim përfundimtar.
Lufta me Iranin ka vënë në pikëpyetje sigurinë e bazave amerikane në rajon, ndërsa dëmet e shkaktuara kanë hapur një debat brenda Pentagonit për mënyrën se si duhet të jetë e organizuar prania amerikane në Lindjen e Mesme në të ardhmen.
Çështja merr rëndësi edhe për shkak të angazhimeve të tjera të SHBA-së, veçanërisht në Indo-Paqësor, ku Uashingtoni po përballet me sfidën e Kinës.
