Ka nisur në Las Vegas gjyqi për vrasjen e reperit të njohur amerikan Tupac Shakur, 30 vjet pas ngjarjes që tronditi botën e muzikës.
Prokuroria pretendon se vrasja ishte një akt hakmarrjeje mes bandave dhe se Duane “Keffe D” Davis, ish-drejtues i South Side Compton Crips, urdhëroi vrasjen pasi nipi i tij, Orlando Anderson, ishte rrahur nga Tupac dhe persona të tjerë.
Sipas prokurorit Binu Pilal, më 7 shtator 1996, Tupac dhe pjesëtarë të grupit të tij u përleshën me Anderson në Las Vegas. Vetëm rreth dy orë e gjysmë më vonë, reperi u qëllua nga një makinë tip “Cadillac” e bardhë, teksa po udhëtonte me makinë.
Prokuroria thotë se Davis nuk e qëlloi vetë Tupac-un, por i dha armën një personi që ndodhej në sediljen e pasme dhe i kërkoi të qëllonte.
Sipas akuzës, Davis ka folur disa herë publikisht për përfshirjen e tij në ngjarje, përfshirë intervista me autoritetet dhe mediat, si dhe në autobiografinë e tij. Prokuroria kërkon që, pas gati 30 vitesh, ai të mbahet përgjegjës për rolin e tij në vrasje.
Davis, tashmë 63 vjeç, i mohon akuzat. Avokati i tij, Michael Sanft, argumentoi para jurisë se prokuroria nuk ka prova të mjaftueshme për të vërtetuar fajësinë e klientit të tij. Sipas mbrojtjes, hetimi policor ndër vite ka qenë i paqartë dhe nuk ka arritur të përcaktojë përfundimisht autorin e vrasjes.
Vrasja që mbeti mister për 30 vjet
Tupac Shakur, i njohur edhe si 2Pac, ishte vetëm 25 vjeç kur u vra. Ai ishte një nga figurat më të rëndësishme të hip-hopit amerikan dhe një prej emrave kryesorë të rivalitetit mes skenës muzikore të Bregut Lindor dhe asaj të Bregut Perëndimor.
Reperi, i njohur për hitet “California Love” dhe “All Eyez on Me”, ishte pjesë e labelit Death Row Records, ndërsa rivaliteti përfshinte edhe Bad Boy Records dhe emra të tjerë të njohur të muzikës amerikane.
Mbrëmjen e 7 shtatorit 1996, Tupac ndodhej në Las Vegas për të ndjekur një ndeshje boksi të Mike Tyson.
Pas përleshjes me Anderson, një makinë “Cadillac” e bardhë iu afrua automjetit ku ndodhej Tupac dhe nga ajo u qëlluan disa plumba. Reperi u plagos rëndë dhe ndërroi jetë disa ditë më vonë.
Hetimi për vrasjen mbeti për dekada pa një autor të akuzuar. Çështja mori një kthesë të rëndësishme pas publikimit, në vitin 2019, të kujtimeve të Davis, ku ai përshkruante rolin e tij në ngjarje.
Megjithatë, Davis më vonë u tërhoq nga këto deklarata, duke pretenduar se ato ishin ekzagjerime dhe se pjesë të librit ishin shkruar nga një person tjetër.
Nëse shpallet fajtor, Davis përballet me burgim të përjetshëm pa mundësi lirimi me kusht.
