Kryeministri i Shqipërisë, Edi Rama, mori pjesë në Konferencën Ndërkombëtare për sfidat dhe ambiciet e reformës së re të sistemit të pensioneve për vizionin e shpalosur nga qeveria “Shqipëria 2030”.
Ai theksoi se para 2014, sistemi i pensioneve ngjante më tepër si asistencë dhe nuk llogaritej mbi bazën e kontributeve, që paguante individi.
Kryeministri theksoi se kjo plagë e madhe që lanë paraardhësit në qeveri po mbyllet dalëngadalë dhe qytetarët që dalin në pension pas skemës së re, përfitojnë më shumë para.
“Niveli i pensioneve, para reformës së 2014, ishte një tavan rreth 200 dollarësh, me llogaritë e sotme 240 euro dhe çfarëdo lloj kontributesh të kishe dhënë nuk merrte më shumë se kaq. Sistemi ishte një sistem asistence dhe nuk ishte sistem kontributiv dhe kjo ka shkaktuar të gjithë plagën e madhe, që po mbyllet dalëngadalë”, tha ai.
Ai pohoi se qeveria do të shkojë paralelisht me bonuset për pensionistët, si një strategji e re për t’i përfshirë ata që të përfitojnë më shumë nga rritja ekonomike e vendit.
“Ne do të ecim paralelisht me bonuset, të cilat janë rritur në mënyrë të ndejshme, janë rritur në aspektin sasior , janë rritur dhe në aspektin e kohës së tyre, nga një bonues në fundvit, te bonusi i pranverës. Duam që këto bonuse të vazhdojnë dhe pensionistët të marrin pjesë në shpërndarjen e fryteve të rritjes ekonomike. Reformimi i skemës së pensioneve është maratonë, nuk është sprint.”, tha ai.
