Një zjarr masiv në një rezervat natyror në lindje të Belgjikës po përhapet drejt kufirit me Gjermaninë, duke detyruar autoritetet gjermane të këshillojnë banorët pranë zonës së rrezikuar të largohen përkohësisht nga banesat.
Zjarri në rezervatin Hautes Fagnes, pranë kufirit gjermano-belg, ka djegur rreth 3 mijë hektarë tokë dhe konsiderohet zjarri më i madh i regjistruar ndonjëherë në Belgjikë.
Në qytetin gjerman Monschau, autoritetet u kanë kërkuar banorëve të disa zonave pranë kufirit të përgatiten për evakuim dhe, në disa raste, të largohen nga shtëpitë për shkak të tymit dhe hirit. Flakët ndodhen vetëm disa kilometra larg kufirit.
Ndërkohë, në anën belge, rreth 600 banorë të komunave Waimes dhe Bütgenbach janë evakuuar që prej së shtunës, ndërsa turistëve u është kërkuar gjithashtu të largohen nga zona.
Mbi 250 efektivë të shërbimeve të emergjencës, përfshirë zjarrfikës belgë, gjermanë dhe luksemburgas, po luftojnë me flakët. Në operacion janë përfshirë edhe helikopterë nga Belgjika dhe Holanda.
