Cristiano Ronaldo dhe partnerja e tij prej vitesh, Georgina Rodríguez, janë martuar zyrtarisht.
Ylli portugez i futbollit, 41 vjeç, dhe modelja 32-vjeçare kurorëzuan dashurinë e tyre në një ceremoni civile private dhe intime, më 11 gusht 2026, në Cascais të Portugalisë, sipas një njoftimi për mediat.
Ceremonia u zhvillua në prani të pesë fëmijëve të çiftit. Pak pas martesës, Ronaldo ndau në rrjetet sociale një foto të duarve të tyre, ku bien në sy unazat e martesës, duke e shoqëruar me mbishkrimin: “C❤️G”.
Martesa vjen saktësisht një vit pas fejesës së tyre. Më 11 gusht 2025, Georgina publikoi në Instagram një foto të dorës së saj mbi atë të Ronaldos, duke treguar unazën e madhe të fejesës me diamant në formë ovale.
“Sí, quiero. En esta y en todas mis vidas”, shkroi ajo, që në shqip do të thotë: “Po, dua. Në këtë dhe në të gjitha jetët e mia.”
Ronaldo dhe Rodríguez janë bashkë që prej vitit 2017 dhe kanë pesë fëmijë: binjakët Eva Maria dhe Mateo, vajzën Alana, vajzën Bella dhe Cristiano Jr., djalin 16-vjeçar të Ronaldos nga një lidhje e mëparshme.
Çifti kishte njoftuar më herët edhe humbjen tragjike të djalit të tyre të porsalindur, Ángel, vëllai binjak i Bellës, në prill 2022.
Ronaldo dhe Georgina u takuan për herë të parë në vitin 2017, kur Rodríguez punonte si shitëse në një dyqan Gucci. Në janar të po atij viti ata u shfaqën së bashku për herë të parë në tapetin e kuq, ndërsa disa muaj më vonë e bënë lidhjen publike edhe në rrjetet sociale.
Pas 9 vitesh së bashku dhe një viti nga fejesa, Cristiano Ronaldo dhe Georgina Rodríguez i kanë thënë zyrtarisht “Po” njëri-tjetrit.
