Radhë të gjata automjetesh janë krijuar në pikën kufitare të Morinës, në hyrje të Kosovës, ku qindra udhëtarë po përballen me pritje deri në një orë.
Temperaturat e larta e kanë bërë edhe më të vështirë qëndrimin në radhë, ndërsa disa drejtues automjetesh kanë përdorur boritë në shenjë pakënaqësie për situatën në kufi.
Fluksi i lartë lidhet me kthimin e pushuesve nga Shqipëria drejt Kosovës dhe vendeve të tjera, si dhe me lëvizjet e diasporës gjatë sezonit veror.
Pritet që fluksi të mbetet i lartë edhe në orët në vijim, duke sjellë vonesa të tjera për udhëtarët.
