Kjo e martë e 4 gushtit mund të shënohet zyrtarisht në kalendarin historik të ekonomisë, si dita ku euro ka kapur nivelin maksimal të zhvlerësimit të saj krahasuar me lekun.
Monedha europiane ka rënë përtokë, duke kapur vlerën dysheme në tregun valutor. Sot një euro po këmbehet me 92.5 lekë.
Deri disa ditë më parë euro po këmbehej me rreth 93.2 ose 93.3 lekë, duke shënuar një nivel konsiderueshëm të ulët dhe zhvlerësues në krahasim me të shkuarën. Por tashmë duket se ato shifra do “t’i kërkojmë me qiri”.
Euro po humbet terren çdo ditë e më shumë përballë monedhën zyrtare vendase, dhe këtë fakt tashmë duket se po e pranon dhe Banka e Shqipërisë, institucioni qëndror që menaxhon paratë e shqiptarëve.
Edhe pse Banka e Shqipërisë ka ndërhyrë vazhdimisht duke blerë euro nga tregu, ka qenë thuajse e pamundur për të ndaluar këtë zhvlerësim.
Çfarë do të thotë për shqiptarët?
Remitancat dhe të ardhurat në euro që u sjellin të afërmit tuaj nga jashtë, tashmë kanë më pak vlerë në treg. Do të blini më pak produkte në treg.
Bizneset eksportuese dhe kryesisht fasoneritët, janë ndër humbësit kryesorë. Të ardhurat e tyre në euro vlejnë më pak.
Të gjithë ata që paguhen në euro, marrin automatikisht më pak lekë, dhe kanë më pak mundësi për të blerë produkte apo shërbime.
Nga ana tjetër, konsumatorët dhe importuesit përfitojnë nga mallrat e huaja që bëhen më të lira në tregun vendas.
Huamarrësit që kanë kredi në euro por paguhen në lekë e kanë më të lehtë shlyerjen e kësteve të tyre mujore.
