Ministria e Drejtësisë pritet ti përcjellë autoriteteve franceze dokumentacionin për ekstradimin e Ermal Beqirit. Burime konfirmojnë se SPAK i ka kërkuar Ministrisë së Drejtësisë t’u dërgojë autoriteteve franceze kërkesën zyrtare për ekstradimin e biznesmenit.
Bashkëngjitur kërkesës do të përcillet edhe vendimi i Gjykatës së Posaçme, e cila ka caktuar ndaj Beqirit masën e sigurisë “Arrest në burg”. Deri tani dokumentacionet janë në fazën e përkthimit dhe më pas do të dërgohen pranë autoriteteve franceze.
Por paralelisht me procedurën e ekstradimit, autoritetet franceze kanë nisur verifikimet dhe hetimet për pasuritë e Ermal Beqirit në Francë, me qëllim bllokimin dhe sekuestrimin e tyre.
Bëhet fjalë për llogari bankare me një vlerë totale prej më shumë se 2 milionë eurosh, dy apartamente, një kështjellë, me vlerë rreth 2.6 milionë euro, si dhe mjete motorike.
Ermal Beqiri u arrestua pak ditë më parë në Francë, pasi u ndalua teksa udhëtonte me avion privat pranë një centrali bërthamor.
SPAK e ka shpallur në kërkim biznesmenin në lidhje me hetimet për abuzimet me tenderat e AKSHI-t, ndërsa ndaj tij janë ngritur akuza për “Konkurrencën e paligjshme nëpërmjet dhunës”, “Heqjen e paligjshme të lirisë”, “Shkeljen e barazisë në tendera”, të kryer në bashkëpunim “Grup i strukturuar kriminal”,etj.
