“Altin Troplinit i shtuam një mbiemër turpi, Altin Aruba, sepse mban sekret emrat organizatorëve kryesorë të takimit të Arubës”, kështu u shpreh kreu demokrat pas daljes nga godina e SPAK ku beri publik edhe mesazhin që kishte lënë në dokumentin e Prokurorisë së Posaçme.
Berisha: Të dashur qytetarë dhe qytetare. Ky është dokumenti që i lashë Altin Troplinit, duke i shtuar dhe një mbiemër turpi, Altin Aruba, Troplini, Gjoka, Hajri e të tjerë, e të tjerë. Pse i shtohet Aruba? I shtohet Aruba sepse dosja Aruba është dëshmia më flagrante e bashkëveprimit, konglomeratit qeveri-trafikant-biznes. Janë bërë publikë emrat e trafikantëve, janë bërë publikë emrat e biznesmenëve, mbahen sekret emrat e organizatorëve kryesorë të takimit të Arubës dhe këtë sekret e mban Altin Troplini për llogari të Edi Ramës. Ndaj dhe sot vendosa që t’ia shtoj dhe një mbiemër për t’ia nxirë dhe më shumë emrin seç e ka të nxirë. Altin Aruba, Troplini, Gjoka dhe Hajri, armikut të egër të pluralizmit politik dhe votës së lirë të shqiptarëve, bashkëpunëtorit të Arubës, Irenës me pesë mbiemra, vrasësit serial Hajri e të tjerë e të tjerë, drejtësia vonon por nuk harron.
Berisha pretendon se disa gra zyrtare të PS po përdorin shtatzëninë dhe mëmësinë për t’iu shmangur përgjegjësive përpara ligjit.
“Po ndërtonin një mini-maternitet. Ishin sjellë aty edhe inkubator për bebet. Afishuan një listë me emra, për të zgjedhur emrin. Po të lindë vajzë do ta quajnë “Skapica” ose “Spakica”, po të lindë djalë “Spakic”, me një fjalë edhe lista e emrave është bërë gati aty, për ato që do quhen bebe SPAKU. Kjo është një tallje, por ka një anë më të paimagjinueshme sesi, ministret, gratë zyrtare të qeverisë përdorin edhe mëmësinë, shenjtërinë e mëmësisë për të shpëtuar nga krimet për të cilat duhet të digjeshin në ferr për vjedhjet që kanë bërë. Nëse kjo vazhdon, Shqipëria do të bëhet vendi më i turpëruar në botë. Në këtë mënyrë turpërohet mëmësia”, tha Berisha.
I pyetur për një rast konkret, Berisha tha: “Ishte Velica, ajo hapi shtegun, flitet për disa ministre, ish ministre, deputete etj. Flitet për epidemi. Përdorin ligjin e shenjtë të mëmësisë dhe natyrës kundër ligjit të shoqërisë, për tiu këndervene kodit penal. Kjo është qeveria e Edi Ramës”.
