Junajtid po shqyrton mundësinë e ofrimit të Rashford te skuadra e Romës, si pjesë e një marrëveshjeje për të ulur koston e nënshkrimit të mesfushorit 25-vjeçar, Manu Kone’. Dihet që lojtari francez është një objektiv i madh për trajnerin Kerrik.
Klubi nga ‘Old Trafford’ po kërkon të ristrukturojë mesfushën, pas largimit të Kasemiros dhe dëmtimit të ligamentit të kryqëzuar të Manuel Ugartes në Kupën e Botës. Mirëpo refuzon të paguajë 60 milionë euro të kërkuara nga klubi italian, Roma. Verdhekuqtë i kanë hapur derën një marrëveshjeje shkëmbimi që përfshin Rashfordin për të lehtësuar transferimin e Konesë, një lojtar që ka tërhequr gjithashtu interes nga klubi i Arabisë Saudite, Al-Ahli.
Duke investuar tashmë rreth 100 milionë euro në nënshkrimet e përbashkëta të Andrej Santos dhe Juri Tielemans, skuadra e Kerrik ka nevojë për një mesfushor të tretë për të forcuar skuadrën për sezonin e ardhshëm. Kurse sulmuesi 28-vjeçar, i cili e kaloi sezonin 2025/2026 në huazim te Barcelona, është nën kontratë me Junajtid deri në vitin 2028 dhe nuk ka luajtur për klubin që nga dhjetori i vitit 2024.
Me skadimin e klauzolës së tij të lirimit prej 40 milionë sterlinash, një transferim në Itali do të varet nga fakti nëse lojtari pranon një ulje page, ose nëse Junajtid merr një përqindje të pagës së tij. Roma duhet të finalizojë shitjen e lojtarit francez për t’u përputhur me rregulloret e UEFA-s për “Fair Play Financiar” dhe për të financuar vetë nënshkrimet e reja.
Nëse nuk mund të arrihet një marrëveshje për shkëmbimin e lojtarëve, bordi i Romës kërkon që çdo ofertë në para të arrijë shumën e plotë prej 60 milionë eurosh të dakordësuara në fillim të negociatave. Te Junajtid, Kerrik e la të hapur mundësinë e mbajtjes së sulmuesit nëse një transferim i përhershëm nuk realizohet gjatë kësaj merkatoje. Megjithatë, drejtuesit e klubit preferojnë ta shesin anglezin, për të ulur faturën e lartë të pagave. Bordet drejtuese të Junajtid dhe Romës do të zhvillojnë takime të mëtejshme ekzekutive gjatë javës së parë të gushtit 2026.
