Kryeministri Edi Rama e ka cilësuar një ditë historike për Shqipërinë nisjen e një faze të re për industrinë ushtarake vendase, pas dorëzimit të mjeteve të para taktike të prodhuara në vend sipas standardeve të NATO-s.
Gjatë ceremonisë së prezantimit të mjeteve të prodhuara nga kompania “Timak Defence” për Forcat e Armatosura, Rama tha se një vizion i shkruar në strategjitë e qeverisë tashmë është kthyer në një realitet të prekshëm.
“Sot ajo që ishte në vizionin dhe strategjinë e shkruar është e prekshme. Flota e prodhuar në Shqipëri për Forcat e Armatosura, sipas standardeve të NATO-s dhe nga profesionistë shqiptarë, sapo ka nisur të vihet në dispozicion të ushtrisë shqiptare”, u shpreh Rama.
Kryeministri tha se përpjekja për zhvillimin e industrisë ushtarake ka nisur nga një situatë e vështirë për Forcat e Armatosura, të cilat sipas tij janë mbajtur ndër vite nga përkushtimi dhe profesionalizmi i ushtarakëve.
Sipas Ramës, për një kohë të gjatë Shqipëria nuk kishte kapacitete të sajat në fushën e prodhimit ushtarak dhe mbështetej kryesisht te blerjet nga jashtë.
“Përpjekja ka nisur në buzë të greminës për Shqipërinë dhe FA, të cilat ishin në pikë të hallit, të cilat ishin thjesht dhe vetëm një ushtri që mbahej në këmbë nga pasioni, vullneti, dija dhe patriotizmi i atyre që qysh në fëmijëri ia kanë kushtuar jetën uniformsë së ushtarakut. Ishin të braktisur në fatin e tyre. As nuk bëhej fjalë të përfytyronim një industri ushtarake. Historitë e tenderave, historitë e blerjve të makinerive laramane ishin historia e përditshme e shtetit shqiptar në të gjitha institucionet”, tha Rama.
Ai theksoi se mjetet e para taktike të prodhuara në Shqipëri përbëjnë vetëm fillimin e një procesi më të gjerë për zhvillimin e industrisë së mbrojtjes në vend.
“Sot jemi dëshmitarë se kemi hyrë në në fazë të re, jemi dëshmitarë të një Shqipërië që nuk është vetëm përdoruese e teknologjisë së mbrojtjes, por edhe projektuese dhe zhvillueve e kapaciteteve tekonologjike, të cilat sapo kanë nisur të japin rezultatet e para”, tha shefi i qeverisë.
