Diaspora shqiptare ka lajmëruar se të shtunën e 1 gushtit do mbajë një protestë kombëtare masive në bulevardin para kryeministrisë, për të kërkuar largimin e qeverisë dhe ndryshimin e sistemit politik.
Lajmin e dha një prej aktivistëve të protestës popullore, duke lexuar njoftimin e Diasporës.
“Diaspora ka njoftuar në datë 1 gusht, të shtunën, do mbahet në Tiranë protestë kombëtare në bulevard”, tha ai.
Më tej shpjegoi dhe apeloi që të gjithë shqiptarët dhe emigrantët t’i bashkoheshin sheshit atë ditë.
“I bëjë thirrje të gjithë shqiptarëve që përderisa ata nga diaspora po marrin rrugë të gjata, po marrin aviona për të ardhur këtu që të kërkojnë dorëheqjen e Ramës, nuk është arsye që ne të mungojmë”,tha aktivisti.
Ai më tej vuri në dukje se edhe socialistët po e braktisnin Edi Ramën dhe PS-në, sikurse lëvizja qytetare në Poliçan, me protestën kundër reformës territoriale.
Aktivisti Arben Kola nga protesta e 61 para Kryeministrisë ftoi qytetarët shqiptarë, nga jugu në veri që t’i bashkohen revoltës popullore në 1 gusht, në protestën kombëtare.
Ai lexoi një mesazh që i kishte ardhur nga një qytetar nga Korça. Ai deklaroi se në Korçe ishin shantazhuar të gjithë ata që punonin në administratë, që mos të merrnin pjesë në protestë.
“Vrisni frikën, merrni pjesë në protestë. Rama i ka ditët e numëruara. Sot në Poliçan po protestohet. Dhe disa të PS kanë marrë teserat e Rilindjes mavi dhe po i djegin.”, tha ai.
