Përplasja mes UEFA-s dhe FIFA-s ka arritur një tjetër nivel. Të 55 federatat europiane kanë vendosur unanimisht të mos marrin pjesë në asnjë turne të organizuar nga FIFA, për sa kohë Gianni Infantino nuk tërhiqet nga projekti i tij i diskutueshëm.
Kreu i FIFA-s synon t’u shesë investitorëve privatë një pjesë të të drejtave dhe vlerës tregtare të Kupës së Botës dhe kompeticioneve të tjera. Në këmbim, federatat që e mbështesin projektin do të përfitonin menjëherë 20 milionë dollarë dhe pagesa më të larta vjetore.
UEFA reagoi ashpër përmes një deklarate të përbashkët, duke e cilësuar propozimin si një kërcënim për të ardhmen e futbollit.
“Kupa e Botës nuk është në shitje. Ajo nuk mund të trajtohet si një produkt investimi. Asnjë pjesë e saj nuk duhet t’u dorëzohet investitorëve privatë”, thuhet në deklaratë.
Sipas UEFA-s, hyrja e investitorëve do të bënte që vendimet për kalendarin, formatet e turneve dhe të ardhmen e futbollit të udhëhiqeshin nga fitimi financiar dhe jo nga interesat e sportit.
Federata e Indonezisë, e drejtuar nga ish-pronari i Interit, Erick Thohir, është e para që ka shprehur mbështetjen për planin e Infantinos.
