Komisioni Disiplinor i FIFA-s ka hapur zyrtarisht hetim për incidentet e ndodhura pas finales së Kupës së Botës mes Spanjës dhe Argjentinës.
Nën hetim janë futbollistët argjentinas Leandro Paredes, Nahuel Molina dhe Thiago Almada, si dhe ndihmëstrajneri Roberto Ayala. Procedim disiplinor është hapur edhe ndaj mesfushorit spanjoll Gavi.
Paredes, Molina dhe Ayala dyshohen për veprime agresive, ndërsa Almada, Molina dhe Gavi po hetohen për sjellje josportive. Personat e përfshirë kanë të drejtë të paraqesin versionin e tyre përpara se FIFA të marrë vendimin përfundimtar.
Një procedim i veçantë është hapur edhe ndaj Federatës Argjentinase të Futbollit. AFA po hetohet për kore dhe gjeste diskriminuese, vonesa në nisjen e ndeshjeve, mosrespektim të protokolleve të sigurisë, shfaqje mesazhesh të papërshtatshme dhe hedhje objektesh nga tifozët gjatë disa ndeshjeve të Botërorit.
Vendimet dhe dënimet e mundshme do të bëhen publike pas përfundimit të procesit disiplinor.
