Plani i Gianni Infantinos për të krijuar një kompani që do të menaxhonte Kupën e Botës për meshkuj, femra dhe klube, duke u hapur rrugën investitorëve privatë, ka shkaktuar reagime të forta edhe në politikë.
Kryeministri britanik, Andy Burnham, e ka kundërshtuar publikisht këtë ide, duke theksuar se futbolli nuk mund të trajtohet si një produkt për t’u shitur.
“Futbolli nuk u përket investitorëve. U përket njerëzve që mbushin tribunat dhe qëndrojnë pranë fushës çdo javë, në shi apo në diell. Kupa e Botës nuk është një produkt, por kompeticioni më i madh sportiv në botë. Futbolli u përket tifozëve”, shkroi Burnham.
Reagimi i tij vjen pas kundërshtimeve të forta nga UEFA, Concacaf dhe Federata Angleze e Futbollit, të cilat nuk e mbështesin përfshirjen e kapitalit privat në menaxhimin e kompeticioneve të FIFA-s.
Sipas raportimeve, mes investitorëve të mundshëm përmendet edhe Joshua Kushner, vëllai i dhëndrit të presidentit amerikan Donald Trump.
Infantino kishte tentuar edhe në vitin 2018 të krijonte kompeticione të reja me mbështetjen e investitorëve të huaj, por projekti u bllokua pas kundërshtimit të UEFA-s.
