Vinícius Júnior është pranë rinovimit të kontratës me Real Madridin, por vlera e tij për klubin nuk kufizohet vetëm te paraqitjet në fushë.
Madrilenët zotërojnë rreth 50 për qind të të drejtave të imazhit të brazilianit, i cili është kthyer në një prej futbollistëve më të kërkuar nga kompanitë e mëdha ndërkombëtare. Për këtë arsye, të ardhurat që gjeneron nga sponsorët mbulojnë një pjesë të konsiderueshme të pagës së tij.
Gjatë Kupës së Botës, Vinícius kishte rreth 17 marrëveshje sponsorizimi, duke bashkëpunuar me marka të njohura si Nike, Apple, Pepsi, PlayStation, Visa, Prada dhe Gatorade.
Menaxhimi i karrierës së tij tashmë funksionon si një kompani e mirëfilltë, me drejtues dhe departamente të posaçme për financat, marketingun, komunikimin dhe çështjet ligjore.
Përveç suksesit sportiv, angazhimi i Vinícius kundër racizmit dhe aktivitetet sociale përmes fondacionit të tij e kanë bërë figurën e brazilianit edhe më tërheqëse për sponsorët.
Që prej transferimit nga Flamengo për 45 milionë euro, Vinícius ka regjistruar 375 ndeshje, 128 gola dhe 85 asistime me Real Madridin, duke qenë një nga protagonistët e dy triumfeve të fundit në Ligën e Kampioneve.
