Komiteti Olimpik Ndërkombëtar ka bërë të ditur se nuk do të hapë hetim ndaj presidentit të FIFA-s, Gianni Infantino, pasi ankesa e paraqitur ndaj tij nuk hyn në kompetencat e komisionit të etikës së IOC-së.
Organizata FairSquare kishte akuzuar Infantinon për shkelje të parimit të neutralitetit politik, pas afrimit të tij me presidentin amerikan Donald Trump.
Polemikat u shtuan gjatë Kupës së Botës, kur Trump pranoi se kishte telefonuar Infantinon për t’i kërkuar rishikimin e kartonit të kuq të Folarin Balogun. Sulmuesi amerikan pritej të mungonte ndaj Belgjikës, por dënimi i tij me një ndeshje u pezullua për 12 muaj dhe ai u aktivizua në humbjen 4-1.
IOC sqaroi se çështja lidhet me vendimet e brendshme të FIFA-s, marrëdhëniet e saj me qeveritë dhe zbatimin e rregullave të futbollit, tema që janë jashtë fushës së veprimit të kodit të etikës olimpike.
Ndërkohë, Federata Norvegjeze e Futbollit po shqyrton mundësinë e një ankese zyrtare në komisionin e etikës së FIFA-s për vendimin ndaj Balogun.
