Barcelona ka marrë lajmin më të keq për Frenkie de Jong. Mesfushori holandez ka pësuar këputje të plotë të ligamentit anësor të brendshëm në gjurin e djathtë dhe pritet të qëndrojë jashtë fushave për pesë deri në gjashtë muaj.
Sipas raportit mjekësor, 29-vjeçari ka shumë gjasa t’i nënshtrohet një ndërhyrjeje kirurgjikale, ndërsa rikthimi i tij nuk pritet përpara janarit të vitit 2027.
Kjo është një goditje e rëndë për Hansi Flick, i cili humbet një nga lojtarët kryesorë të mesfushës për një pjesë të konsiderueshme të sezonit. Drejtuesit e klubit duhet të rivlerësojnë gjithashtu planet për të ardhmen e Marc Casadós.
Sipas “AS”, te Barcelona ka pakënaqësi të madhe për mënyrën si është menaxhuar dëmtimi nga stafi i Holandës dhe trajneri Ronald Koeman. Klubi beson se De Jong luajti i dëmtuar për 110 minuta në ndeshjen ndaj Marokut, madje pasi kishte marrë një injeksion për të qenë në dispozicion.
Barcelona pretendon se nuk ishte informuar për gjendjen e lojtarit. Pas rikthimit në klub, ënjtja në gju nuk lejoi një diagnozë të menjëhershme, por ekzaminimet e mëvonshme konfirmuan dëmtimin e rëndë.
Klubi pritet të përfitojë kompensim nga FIFA për periudhën e gjatë të mungesës së holandezit, me shumën që mund të arrijë rreth tre milionë euro.
