Ministri i Drejtësisë, Toni Gogu, ka deklaruar se një nga sfidat kryesore të sistemit të drejtësisë mbetet koha.
“Sfida e parë që kemi është koha. Ka qytetarë që janë duke pritur në korridoret e gjykatave, prokurorive, zyrave përmbarimore. Dua ta them, sidomos për sistemin gjyqësor, ne do masim çdo ditë kohën dhe do të mbajmë përgjegjës sistemin”, deklaroi Gogu.
Sipas ministrit, aktualisht në sistemin gjyqësor mungojnë 111 magjistratë, duke e bërë plotësimin e vakancave një nga prioritetet kryesore.
“Sot mungojnë 111 magjistratë në sistemin gjyqësor. Për këtë arsye mbushja e vakancave është e rëndësishme. Qasja është komplekse, pasi Shkolla e Magjistraturës ka bërë më shumë pranime, por një element tjetër shumë i rëndësishëm është përshpejtimi i digjitalizimit, i cili do të rrisë eficencën në sistem”, u shpreh ai.
Gogu renditi edhe dy sfida të tjera për drejtësinë; ritmin e institucioneve të pavarura dhe rritjen e besimit të qytetarëve te sistemi.
Sipas tij, institucionet e pavarura duhet të përshpejtojnë punën për plotësimin e vakancave, ndërsa besimi i publikut mbetet një objektiv që duhet të forcohet vazhdimisht.
Ministri u ndal edhe te objektivi i Shqipërisë për mbylljen e kapitullit 23 në procesin e integrimit evropian, duke theksuar se nga ky afat e ndajnë rreth 60 javë.
“Për t’u kthyer edhe njëherë te objektivi ynë madhor, që është mbyllja e kapitullit 23 në fund të vitit 2027, nga e cila na ndajnë 60 javë. Kemi një kronometër dhe kronometri që Ministria e Drejtësisë ka nuk është vetëm kronometri i Komisionit Evropian, por është edhe i qytetarit shqiptar”, tha Gogu.
Ai theksoi se qytetarët presin që standardi evropian të reflektohet në sallat e gjyqit dhe në funksionimin e përditshëm të drejtësisë.
“Reforma në drejtësi nuk ka qenë kurrë një projekt i lehtë. Është e rëndësishme që ne të bëjmë punën tonë, gjyqtari të vijojë të bëjë punën e vet, të japë drejtësi në kohë dhe ne si Ministri e Drejtësisë të sigurojmë të gjitha kushtet që nevojiten për të bërë këtë punë”, përfundoi ministri Gogu.
