Drejtoria Vendore për Kufirin dhe Migracionin në Korçë ka shtuar masat në të katër pikat e kalimit kufitar në juglindje të vendit, për të përballuar rritjen e lëvizjeve gjatë sezonit turistik.
Fluksi më i madh është regjistruar në pikat kufitare të Kapshticës dhe Qafë Thanës, ku gjatë periudhës së verës qarkullojnë mesatarisht deri në 20 mijë shtetas shqiptarë dhe të huaj në ditë.
Për menaxhimin e situatës, Policia Kufitare ka rritur numrin e sporteleve në funksion dhe ka shtuar efektivët në shërbim, me qëllim përshpejtimin e procedurave të kontrollit dhe shmangien e pritjeve të gjata për udhëtarët.
Vendimi për shtimin e masave vjen pas radhëve të krijuara ditët e fundit në këto dy pika kufitare, ku në oraret me fluks të lartë pritjet kanë shkuar deri në dy orë.
Në Kapshticë, vonesat janë shkaktuar kryesisht nga kontrollet më të detajuara të kryera nga pala greke, ndërsa në Qafë Thanë pritjet lidhen me kapacitetet e reduktuara të personelit të palës maqedonase gjatë sezonit turistik.
Policia Kufitare bën të ditur se shërbimet e përforcuara do të vijojnë gjatë gjithë sezonit veror, me synim garantimin e një qarkullimi sa më të shpejtë, të rregullt dhe të sigurt për të gjithë udhëtarët.
