Një histori e pazakontë ka tërhequr vëmendjen në Itali, pasi rreth 350 shezlongë të vjedhur dy vite më parë nga një kompleks me pishinë në Reggio Emilia u zbuluan në një plazh në Shqipëri.
Vjedhja ndodhi dy vjet më parë në kompleksin “Onde Chiare”, ku u zhdukën rreth 350 shezlongë, duke shkaktuar një dëm ekonomik prej afro 45 mijë eurosh.
Zbulimi u bë një vit më vonë, kur një e njohur e administratorëve të kompleksit ndodhej me pushime në plazhin e Kepit të Rodonit, pranë Durrësit. Ajo vuri re dhjetëra shezlongë që i dukeshin të njohur.
Dyshimet u konfirmuan pasi në pjesën e sipërme të shezlongëve ishte ende i dukshëm logoja e kompleksit italian “Onde Chiare”, duke ngritur dyshime se bëhej fjalë për të njëjtët shezlongë të vjedhur.
Rasti ka ngjallur interes edhe në mediat italiane, ndërsa pritet të zbardhet se si shezlongët përfunduan në një plazh në Shqipëri dhe nëse do të ketë hetime për identifikimin e personave përgjegjës.
