Në debatin e fortë që ka nisur në Shqipëri me zhvleftësimin e fortë të euros, veçanërisht gjatë vitit të fundit, duket se është bashkuar edhe Fondi Monetar Ndërkombëtar. Në vlerësimin e fundit për Shqipërinë, ekspertët e Fondit konkludojnë se kursi i lirë i këmbimit është i përshtatshëm për ekonominë shqiptare.
Lidhur me këtë eksperti i ekonomisë Elvin Meka, në një studio televizive u shpreh se regjimi i lirë është pozitiv për ekonominë shqiptare teksa theksoi se nuk mund të konsiderohet tërësisht i lirë pasi herë pas here kemi dhe ndërhyrje nga shteti.
Ai tha se në vlerësimin e flukseve të euros nuk merren parasysh paratë informale të cilat janë të fokusuara kryesisht në disa sektorë që nuk rrisin ekonominë.
Sipas tij nuk është faji i kursit të këmbimit që në vendin tonë pastrohen para të pista, ndërsa me rëndësi mbetet që forcimi i lekut duhet të bazohet te rritja e produktivitetit.
“Regjimi i lirë është pozitiv për ekonominë shqiptare. Në fakt kurs i lirë i këmbimit nuk është tërësisht i lirë sepse ka ndërhyrje nga shteti përmes bankës së Shqipërisë, vetëm në momente specifike kur kemi një shbalancim ose disekuilibër të tregut që vjen për shkaqe të ndryshme mund të ndërhyjmë për të ndërprerë optimizmin e tepërt ose kufizuar pesimizmin e tepërt në treg.
Shifrave formale duhet ti shtojmë dhe pjesën e ekonomisë informale sepse 40% janë në ujë të padeklaruara të pambikëqyrura. Po ashtu kemi dhe prurjet kriminale. Problematikat që ka Shqipëria është se nuk na gjen e keqja nga fluksi i investimeve të huaja, por problemi është se ne kemi fluks parash por ato po shkojnë në sektor që kanë produktivitet të ulët, pra flukset e larta që shoqërohen në hyrje në ekonominë shqiptare nuk konvertohen në investime që rrisin produktivitetin e punës.
Do ishte në nderin dhe krenarinë shqiptare që të kishim një lekë të fortë por në bazë të rritjes së produktivitetit. Ndërsa në rastin tonë kemi vetëm flukse por nuk shkojnë te investimet që rrisin produktivitetin.
Në kushte të tilla një kurs i lirë i këmbimit të jep mundësinë të krijohen këto luhatje, por këtu problemi nuk është te kursi i lirë i këmbimit, është te qeveria që duhet të ndërhyjë duke ndryshuar politikat fiskale.
Kur ndërtojmë politikat ekonomike ato duhet të jenë të lidhura logjikisht me njëra tjetrën. Nuk mund të jetë efikase një politikë monetare kur ti ke dhe 6 probleme të tjera që si adreson pothuajse fare dhe pastaj ja vendos fajin kursit të këmbimit.”
