Ekipet e shpëtimit janë ende në kërkim të personave të zhdukur nga përmbytjet katastrofike në Jabllanicë dhe Konjic, në Bosnjë-Hercegovinë.
Ekipet e shpëtimit po kërkojnë në të dy brigjet e Neretvës nga Donja Jabllanica deri në Prenjske në liqenin e Jabllanicës, njoftoi RTRS.
Komunikimi rrugor ndërmjet Mostarit dhe Jabllanicës është ende i ndërprerë, ndërsa pjesët ndërmjet Jabllanicës dhe Konjicit, si dhe Jabllanicës dhe Prozorit janë riparuar.
Për shkak të përmbytjeve në Bosnjë-Hercegovinë humbën jetën 19 persona, ndërsa shumë të tjerë kanë mbetur të lënduar.
Deri më tani, trupat e 16 viktimave janë gjetur në zonën e Jabllanicës dhe Konjicës në Hercegovinë.
Tre njerëz kanë humbur jetën në Fojnicë nga vërshimet dhe rrëshqitjet e dheut, sipas Mbrojtjes Civile të kësaj komune në Bosnjën qendrore.
“Kemi shumë njoftime për persona të zhdukur”, tha zëdhënësi i Qeverisë së Qarkut të Hercegovinës dhe Neretvës (HNK), Darko Juka, disa ditë më parë.
Ai shtoi se situata më kritike është në zonën e Donja Jabllanica, që gjendet në rrugën nga Mostari për në Sarajevë.
Qeveria e Federatës së Bosnje e Hercegovinës (BeH) shpalli “gjendje të fatkeqësisë natyrore” në këtë entitet pas reshjeve të shumta që shkaktuan rrëshqitje dhe lëvizje të tokës në Hercegovinë dhe Bosnjën qendrore.
