Analisti Arben Meçe, i cili në fillim të portestave në Shqipëri propagandoi si të vërtetë foton me inteligjencë artificiale të autobusëve grekë në kufij, gjatë një interviste për ABC News ka akuzuar lëvizjen Vetëvendosje për ndërhyrje në protestat në Shqipëri, duke e cilësuar veprimin si antikombëtar dhe të fshehur pas emrit të diasporës.
Ai tha se prezenca e VV u bë e dukshme pas ndalimit të vendosur nga shteti shqiptar dhe kujtoi protestën e madhe ku, sipas tij, nga Kosova hynë në territorin shqiptar 10 deri në 15 mijë persona.
Meçe u shpreh se do të ishte më i ndershëm debati nëse ata do të mbanin hapur flamujt e Vetëvendosjes dhe të deklaronin se po vinin për të “çliruar Shqipërinë”.
Ai i quajti “skutha” ata që hyjnë nën emrin e diasporës, duke theksuar se nuk janë patriotë që diskutojnë çështje kombëtare, por po kryejnë një akt të rrezikshëm për sovranitetin e vendit.
“Problemi që VV është prezentë në protesta doli pasi shteti shqiptar bëri një ndalim. Në dijeni time, kur është bërë protesta e madhe ku 30 makina të udhëhequra nga një person nga Anglia u futën në territorin e Shqipërisë nga Kosova janë futur 10 deri 15 mijë persona. Do ishte më i ndershëm ky debat, që ata të kishin flamujt e Vetëvendosjes, dhe të thonin jemi VetëVendosja po vijmë të çlirojmë Shqipërinë. Këta skutha që futen në Shqipëri nën emrin e Diasporës, por jo të Vetëvendojes nuk janë ata patriotë që diskutojnë çështje kombëtare, sepse janë skutha. Përse u desh që këta 10-15 mijë kosovarë që u futën në Shqipëri të transmetoheshin si diasporë kur nuk ishin diasporë? Dhe të mos dilnin hapur. Pse e fshehu këtë të vërtetë Vetëvendosja? 10-15 mijë janë jo vetëm ndërhyrje në punët e brendshme, por është akti më antikombëtar dhe më antishqiptar që bëhet. Shqipëria është vend Sovran, po ashtu Kosova, Mali i Zi dhe juridiksioni i çdo qytetari është brenda territorit të vet.“, tha Meçe.
