Gjykata Administrative e Tiranës ka vendosur në favor të profesoreshës Dorina Hoxha, duke urdhëruar rikthimin e saj të menjëhershëm në detyrën e dekanes së Fakultetit të Drejtësisë. Me këtë vendim, gjykata ka shfuqizuar aktin administrativ të rektorit të Universitetit të Tiranës, Artan Hoxha, i cili më 20 maj vendosi pezullimin e saj nga detyra, pas shprehjes së interesit për të kandiduar në Këshillin e Lartë Gjyqësor.
Vendimi i Gjykatës Administrative ka efekt të menjëhershëm, ç’ka nënkupton se profesoresha Dorina Hoxha rikthehet në drejtimin e Fakultetit të Drejtësisë, ndërsa dekani i komanduar, profesori Skënder Kaçupi, tashmë në moshën 72-vjeçare, i liron vendin.
Çështja nxori në pah përplasjet institucionale brenda Fakultetit të Drejtësisë dhe Universitetit të Tiranës. Me vendimin e saj, gjykata vlerësoi se akti i pezullimit duhet të shfuqizohej, duke i hapur rrugë rikthimit të Hoxhës në detyrë. Pas rreth dy muajsh proces gjyqësor, profesoresha Dorina Hoxha arriti të sigurojë një vendim në favor të saj, duke rikthyer kështu statusin e mëparshëm si drejtuese e Fakultetit të Drejtësisë.
