Gara për stolin e Italisë ka hyrë në fazën vendimtare dhe Andrea Pirlo tashmë nuk është më thjesht një ide surprizë, por një kandidat shumë serioz.
Pas takimit të parë mes Giovanni Malagò, Paolo Maldinit dhe Leonardos, profili i ish-mesfushorit duket ai që përputhet më shumë me vizionin e ri teknik të kombëtares italiane. Trajneri i ardhshëm do të marrë drejtimin e “Azzurrëve” për ciklin katërvjeçar deri në Botërorin 2030, ndërsa vendimi pritet të bëhet i ditur në fillim të javës së ardhshme.
Malagò ka theksuar se zgjedhja do të jetë e përbashkët, në një mënyrë të re pune për federatën italiane. Deri më tani, emërimi i trajnerit ka qenë kryesisht kompetencë e presidentit të FIGC, por këtë herë pesha teknike e Maldinit dhe Leonardos do të jetë vendimtare.
Në listën e ngushtë mbeten katër emra: Andrea Pirlo, Antonio Conte, Roberto Mancini dhe Pep Guardiola.
Conte ka qenë për një kohë të gjatë një nga favoritët, sidomos për aftësinë e tij për të futur menjëherë mentalitetin fitues te lojtarët. Mancini, nga ana tjetër, ka një vizion që përputhet me idetë e Maldinit dhe Leonardos, por e kaluara e tij në krye të Italisë e bën kandidaturën më të ndërlikuar.
Guardiola mbetet ëndrra më e madhe. Emri i tij intrigon shumë drejtuesit italianë, por operacioni është i komplikuar, sidomos në aspektin ekonomik. Nëse Pep do të pranonte, pas tij do të lëvizte një botë e tërë sponsorësh dhe interesi ndërkombëtar, por për ta bindur duhen kohë, durim dhe kushte të përshtatshme.
Pikërisht këtu fiton terren Pirlo. Ai shihet si një emër i ri, me histori të madhe si lojtar, pjesë e Italisë kampione bote në vitin 2006, por edhe si një trajner që kërkon ende afirmimin e madh. Për Maldinin dhe Leonardon, ky profil mund të përfaqësojë rrugën e re që Italia dëshiron të ndërtojë.
Më 23 korrik, drejtuesit e rinj të Club Italia do të paraqesin projektin e tyre para klubeve të Serie A. Maldini do të shpjegojë revolucionin teknik, ndërsa Leonardo rolin e tij si këshilltar. Deri atëherë, pritet që zgjedhja e trajnerit të jetë praktikisht e vendosur.
Pirlo, Conte, Mancini dhe Guardiola janë katër emrat që mbeten në garë, por në këtë moment ish-regjisori i madh i mesfushës italiane duket përpara të gjithëve. Stoli i Italisë pret vendimin final dhe Pirlo është gjithnjë e më pranë një kapitulli të ri me “Azzurrët”.
