Taulant Balla ka reaguar sërish me tone ironike dhe provokuese ndaj forcave politike që iu bashkuan protestës së qytetarëve, duke i akuzuar se e shfrytëzuan tubimin për fotografi dhe përfitim politik.
Në një postim në rrjetet sociale, Balla tregon se një përfaqësues i këtyre partive i kishte thënë në Kuvend se fotografitë e publikuara prej tij ishin një tallje me protestën.
Por Balla e kundërshton këtë interpretim, duke deklaruar se respekton qytetarët që protestuan për shqetësime reale, nga mbrojtja e natyrës deri te zemërimi ndaj zyrtarëve që shpërdorojnë besimin publik.
Sipas tij, qytetarët që protestuan në mënyrë të sinqertë kishin të drejtë të dëgjoheshin dhe shqetësimet e tyre meritojnë dialog, reflektim dhe zgjidhje konkrete.
Megjithatë, në fund të reagimit, Balla lëshon edhe provokimin e radhës ndaj organizatorëve dhe përfaqësuesve politikë të protestës.
“Por sot ata nuk janë më këtu. Aty kanë mbetur sorrat”, shkruan Balla, duke përdorur simbolin e flamingove për protestuesit që, sipas tij, kishin kauza legjitime, ndërsa partitë politike i etiketon në mënyrë përçmuese.
