Meteorologët parashikojnë se kjo javë do të jetë java më e nxehtë e muajit korrik. Sipas sinoptikanëve, prej të martës, Shqipëria do të futet në brendësi të valës së të nxehtit.
“Nga e marta e deri në fundjavë, sërish kemi valë të nxehti afrikan, ku do të godasin pjesën më të madhe të rajonit të Ballkanit, duke sjellë një mot të kthjellët, por të nxehtë. Termometri parashikohet që ditën e martë të ngjitet në 37 gradë, 38 gradë gjatë ditës së mërkurë. E enjtja dhe e premtja, dy ditët më të nxehta të javës, ku presim dhe 40 gradë. Zonat të cilat do të kenë temperatura më të larta do të jenë qarku i Shkodrës, Berati, Elbasani, Gjirokastra, Tirana dhe Fieri”, u shpreh Lajda Porja.
Për shkak edhe të erës që do të jetë prezente, meteorologët ngrenë alarmin e rrezikut nga zjarret.
“Parametri i erës do të jetë herë pas here mesatar, por në momente të veçanta pak e fortë, gjë e cila do të sjellë probleme për zonat me zjarre, duke rrezikuar zjarre në shumë qarqe të Shqipërisë, për shkak se ajo i favorizon duke zgjeruar hartën e tyre. Shtuar edhe kësaj teme temperaturat e larta që presim gjatë kësaj jave, kujdesi duhet të jetë pak i lartë”, tha sinoptikanja.
Temperaturat do të jenë të larta jo vetëm në vlerat maksimale, por edhe në vlerat minimale.
