Ka nisur në Gjykatën e Posaçme seanca e radhës në procesin penal ndaj kreut të Partisë së Lirisë, Ilir Meta, i cili po hetohet për veprat penale të korrupsionit, pastrimit të parave dhe fshehjes së pasurisë.
Meta është i pranishëm në seancë, ndërsa ka deklaruar se avokati i tij mbrojtës do të jetë Bujar Musta. Bëhet me dije se Meta ka deklaruar gjithashtu në seancë se nuk i janë vënë në dispozicion të gjitha aktet.
“Nuk më janë vënë në dispozicion të gjithë aktet me qëllim që procesi të zhvillohet në një kohë sa më te shpejtë”, është shprehur Meta.
Kujtojmë se më 29 qershor u njoftua se avokati Kujtim Cakrani nuk do të jetë më përfaqësues ligjor i kreut të Partisë së Lirisë, Ilir Meta.
Lajmi u konfirmua nga vetë zyra ligjore e Cakranit me anë të një njoftimi për mediet, ku sqaron se shkak për këtë është mungesa e bashkëpunimit të nevojshëm dhe humbja e besimit reciprok. Në njoftim thuhej se nuk ka asnjë konflikt interesi apo akuza reciproke.
