Erling Haaland është një nga emrat më të mëdhenj të këtij Botërori. Sulmuesi norvegjez ka shkëlqyer me paraqitjet e tij dhe ka shënuar shtatë gola, duke udhëhequr Norvegjinë në një rrugëtim historik.
Interesimi i Real Madridit për Haaland nuk është diçka e re. Emri i tij është lidhur prej vitesh me klubin madrilen dhe, sipas njerëzve që e njohin nga afër, kalimi i tij në “Santiago Bernabeu” mund të jetë vetëm çështje kohe.
Presidenti i Borussia Dortmund, Joachim Watzke, ka folur më herët për të ardhmen e norvegjezit dhe ka dhënë një deklaratë të qartë për dëshirën e lojtarit.
“Erling e do Real Madridin dhe nuk e fsheh. Mendoj se pas dy ose tre vitesh do të luajë atje, por jo tani. Koha e tij do të vijë”, u shpreh Watzke.
Haaland aktualisht është pjesë e Manchester Cityt, ku ka një kontratë shumë të rëndësishme dhe një rol qendror në projektin e klubit anglez. Megjithatë, agjentët e tij kanë theksuar gjithmonë se lojtarët vendosin vetë për të ardhmen dhe për momentin e duhur të lëvizjes.
Botërori e ka rritur edhe më shumë vëmendjen rreth tij. Pas eliminimit të Brazilit, ku Haaland ishte vendimtar, sulmuesi konfirmoi edhe një herë forcën e tij fizike, instinktin për gol dhe aftësinë për të vendosur ndeshje të mëdha.
Real Madrid e ka ndjekur prej kohësh, që kur ai po spikaste te Molde në moshë shumë të re. Atëherë madrilenët nuk bënë lëvizjen vendimtare dhe Haaland përfundoi fillimisht te Salzburg, përpara se të ndërtonte karrierën e tij në nivelet më të larta.
Tani, me vlerën e tij në kulm dhe me statusin si një nga sulmuesit më të frikshëm në botë, emri i Haaland vazhdon të jetë i lidhur me Real Madridin. Ashtu si me Mbappé, madrilenët mund të duhet të presin, por ideja e një transferimi të madh në të ardhmen mbetet e hapur.
